Category: Uncategorized

Tracey Boayke as we all know say she be kumawood actress, but the kind of money this kiddie dey show for social media be mind bosting. If you go kai aa just some days ago she then Mzbel get some small beef over “Papa no”, wei people dey claim say ebi wanna former ogboro den things. This matter wei Opeimu Kennedy Agyapong come talk some.

Opeimu say Tracey blackmail former Ogboro take buy house for east leg, as he talk this matter sef everybody komot eye chork for one side. We no know what happen wei loud mouth Tracey drop some video dey tear Opeimu Agyapong warning say make he no try move to am kraa na she make ready for am. Eiiii be like Tracey she be lioness oo, sekof the vim she get drop that video de3 aswear say that vim some Moses take path the red sea. By the way Tracey make we know say ein wealth all she dey eat ein body take get, this be her reply to Opeimu as them say she be cheap girl.

Ah well, make we see what Hon. Opeimu Kennedy Agyapong too go talk next………that be the matter we dey try settle since oo.

Good morning readers, yestee wei fellow Ghanaians come give we small updates on the covid-19 measures. Then some of we dey expect more things, but be like senior man get ein own plans. Make we see some of the things he come talk.

Bossu say the new voter register be the most credible in the history of wanna country, aknow say some people no go gree, if you like go burn sea bossu talk finish yapon.

One thing he talk wei dey bost ma brains kraa be the reopening of some tertiary institutions. UCC, UHAS and some other poly people go gbele on the 24th of August. Be like you know go better school aa your school go fall in the some others category oo. Ah well…….learn oo.

Before ago forget, fellow Ghanaians say he dey spy if them fit open the air borders like September 1st aa, some of we get Austin, Texas go. Bossu guda you do all……aknow by now some people dey hate on me, but GOD NO GO SHAME US!!!

Today Mr. President say he want come give we update on “auntie Coro” (Covid-19). Be like squad forget say that thing sef dey, so Senior man want kai we small. Today dey mong aa ebi 15 times we dey come hear fellow Ghanaians for wanna screens top, make wanna stay glued to your tv sets at 8pm today Sunday, August 16, 2020. As we dey anticipate what fellow Ghanaians go talk, some say he dey come brief we on dates schools go gbele, others too say he dey come tell we say he open wanna borders. Anything bossu go talk bia we dey inside…………………………Be like ago lef you for here today.

This be pidgin channel, we dey bring you all the juicy news wei dey trend for Ghana and beyond in pidgin form………..chillax then anticipate more………..adey4you!!!!